ABBA KABIR YUSUF YA FICE DAGA JAM’IYYAR PDP ZUWA NNPP

Ɗan takarar gwamnan Kano a inuwar jam’iyyar PDP a zaben 2019 Engr Abba Kabir Yusuf ya fice daga jam’iyyar PDP zuwa jam’iyya mai kayan marmari ta NNPP.

Abba Gida-Gida ya ɗauki wannan matakin ne a yau, yayin da ya ke ganawa da shugabannin jam’iyyar NNPP na karamar hukumar Gwale da na mazaɓarsa Ɗiso.

Abba Kabir dai na hannun daman tsohon Gwamnan Kano kuma madugun ɗariƙar Kwankwasiyya Injiniya Dakta Rabi’u Musa Kwankwaso ne, wanda ya bayyana kudurin ficewa daga PDP a ƙarshen wannan wata, bayan kungiyar sa ta The National Movement (TNM) ta narke cikin jam’iyyar NNPP.