Ahmed Ado Bayero ya Yi Mubaya’a ga Sarki Muhammadu Sanusi a Kofar Kudu

Ahmed Ado Bayero, babban hadimin hamɓararren Sarkin Kano, Aminu Ado Bayero, ya yi watsi da tsohon sarkin ya kuma yi mubaya’a ga Sarki Muhammadu Sanusi II.

Ahmad Bayero, wanda kuma shi ne Hakimin Kumbotso, ya kai ziyarar ban girma a fadar Sarki Sanusin, dake Gidan Rumfa ranar Laraba. 

A cikin wani faifan bidiyo da DAILY NIGERIAN ta samu, an hango tsohon shugaban ma’aikatan, wanda ƙani ne ga hamɓararren Sarkin, ya gurfana a gaban Malam Sanusi don miƙa mubaya’ar sa. 

Idan zaku tuna Gwamna Abba Yusuf ne ya naɗa Sarki Sanusi a matsayin Sarkin Kano na 16 a watan Mayu, bayan soke dokar Masarautar Kano ta shekarar 2019, wadda ta rusa dukkan masarautu biyar da Gwamna Abdullahi Ganduje ya kafa.

Daily Nigeria